રાજ્યમાં કાગળ પર ભલે દારૂબંધીના દાવા થતા હોય, પરંતુ કાયદો અને વ્યવસ્થાની રક્ષા કરવાની જવાબદારી જેના પર છે તે જ રક્ષકો જ્યારે ભક્ષક બને ત્યારે સમગ્ર વ્યવસ્થા સામે ગંભીર સવાલો ઊભા થાય છે. અમદાવાદના ચાંદખેડા વિસ્તારમાં નરોડા પોલીસ સ્ટેશનના જ એક કોન્સ્ટેબલની શરમજનક કરતૂત સામે આવી છે, જેમાં તેણે ચિક્કાર દારૂના નશામાં ફુલ સ્પીડ કાર હંકારીને એક એક્ટિવાચાલક અને તેની સગીર ભત્રીજીને અડફેટે લીધા હતા.
અકસ્માત સર્જ્યા બાદ કારચાલક ભાગવાની ફિરાતમાં હતો, પરંતુ આસપાસ એકત્ર થયેલા સ્થાનિક લોકોએ સાહસ દાખવીને કારચાલકને સ્થળ પર જ ઝડપી લીધો હતો. જ્યારે તપાસ કરવામાં આવી ત્યારે જાણ થઈ કે કાર ચલાવનાર શખ્સ બીજું કોઈ નહીં પરંતુ નરોડા પોલીસ સ્ટેશનમાં ફરજ બજાવતો પોલીસ કોન્સ્ટેબલ ગૌરાંગ બળદેવ દવે છે, જે નિકોલમાં રહે છે અને ઘટના સમયે ચિક્કાર નશામાં ધૂત હતો. ગુસ્સે ભરાયેલા લોકોએ નશામાં ધૂત કોન્સ્ટેબલને પકડીને મેથીપાક ચખાડ્યો હતો બાદમાં પોલીસને હવાલે કર્યો હતો.
આ ઘટનાએ ફરી એકવાર સાબિત કરી દીધું છે કે જ્યારે કાયદાનું પાલન કરાવવાની જવાબદારી ધરાવતા કર્મચારીઓ જ કાયદાના લીરેલીરા ઉડાવે ત્યારે સામાન્ય નાગરિકોની સુરક્ષા સામે મોટો પ્રશ્નાર્થ સર્જાય છે. ચાંદખેડા પોલીસે આ મામલે ગુનો નોંધીને કોન્સ્ટેબલ ગૌરાંગ દવેની ધરપકડ કરી લીધી છે અને અકસ્માતમાં ઉપયોગમાં લેવાયેલી ક્રેટા કાર પણ કબજે કરી છે. પોલીસ દ્વારા આ મામલે વધુ કાયદેસરની તપાસ હાથ ધરવામાં આવી છે. અત્રે ઉલ્લેખનીય છે કે, નરોડા પોલીસ સ્ટેશન અગાઉ પણ વિવાદોમાં આવી ચુક્યું છે. જેમાં એક કર્મચારી લાખો રૂપિયાનો તોડ કરતો ઝડપાયા બાદ પોલીસને શરમે ધરમે તેને સસ્પેન્ડ કરવાની ફરજ પડી હતી.
