વિજયાદશમીના પવિત્ર પર્વ નિમિત્તે જામનગરમાં રાજપૂત (ક્ષત્રિય) સમાજ દ્વારા પરંપરાગત શસ્ત્રપૂજનના કાર્યક્રમનું આયોજન કરવામાં આવ્યું હતું. વર્ષોથી ચાલી આવતી ધાર્મિક અને સાંસ્કૃતિક પરંપરાને જાળવી રાખવાના હેતુથી યોજાયેલા આ કાર્યક્રમમાં સમાજના ભાઈઓ અને બહેનો મોટી સંખ્યામાં ઉપસ્થિત રહ્યા હતા.
વિજયાદશમીના પર્વે શૌર્ય, સાહસ અને ધર્મના વિજયના પ્રતીકરૂપે પરંપરાગત શસ્ત્રોનું પૂજન-અર્ચન કરવામાં આવ્યું હતું. આ પ્રસંગે શિક્ષણમંત્રી રિવાબા જાડેજા, પૂર્વ મંત્રી હકુભા જાડેજા સહિતના મહાનુભાવો, સમાજના અગ્રણીઓ અને આગેવાનો ઉપસ્થિત રહ્યા હતા અને શસ્ત્રપૂજનમાં ભાગ લીધો હતો.
કાર્યક્રમ દરમિયાન ક્ષત્રિય સમાજની ગૌરવશાળી પરંપરા, સંસ્કૃતિ અને વારસાનું જતન કરવાની ભાવના વ્યક્ત કરવામાં આવી હતી. વિજયાદશમીના પર્વે આયોજિત આ કાર્યક્રમમાં સમાજની એકતા, સંગઠન અને ભાઈચારાનો સંદેશ આપવામાં આવ્યો હતો. સમગ્ર કાર્યક્રમ ધાર્મિક અને ઉત્સાહભર્યા માહોલમાં યોજાયો હતો.
