અમદાવાદમાં ટ્રાફિક પોલીસની દાદાગીરી અને તોડબાજીનો વધુ એક કિસ્સો પ્રકાશમાં આવ્યો છે. એક્સપ્રેસ હાઈવે ચેક પોઈન્ટ નજીક અન્ય રાજ્યની કારના ચાલકને રોકીને તેને ધમકાવવા અને નાણાંની માંગણી કરવા બદલ એક હેડ કોન્સ્ટેબલ અને એક કોન્સ્ટેબલને પોલીસ કમિશનર દ્વારા સસ્પેન્ડ કરવામાં આવ્યા છે. સોશિયલ મીડિયા પર આ ઘટનાની વિગતો વાઈરલ થયા બાદ પોલીસ વિભાગ સફાળું જાગ્યું હતું.
પંકજસિંહ પરિહાર નામના વ્યક્તિએ સોશિયલ મીડિયા પ્લેટફોર્મ પર પોતાની આપવીતી જણાવતી એક પોસ્ટ મૂકી હતી, જેમાં ગંભીર આક્ષેપો કરવામાં આવ્યા હતા. આઈ ડિવિઝન ટ્રાફિક પોલીસ સ્ટેશનના સ્ટાફે અન્ય રાજ્યની નંબર પ્લેટ હોવાથી કારને રોકીને એક કલાક સુધી બેસાડી રાખી હતી. તપાસના બહાને વાહનચાલકનો મોબાઈલ ચેક કરીને તેને ‘કબૂતરબાજી’ અને સાયબર ક્રાઈમના ખોટા કેસમાં ફસાવી દેવાની ધમકી આપી હતી.પોલીસ કર્મચારીઓએ કેસમાંથી મુક્તિ મેળવવા માટે ‘સેટલમેન્ટ’ પેટે નાણાંની માંગણી કરી હતી.
આ પોસ્ટ સોશિયલ મીડિયા સેલના ધ્યાને આવતા ઉચ્ચ અધિકારીઓને રિપોર્ટ કરવામાં આવ્યો હતો. તપાસમાં તથ્ય જણાતા પોલીસ કમિશનર દ્વારા તાત્કાલિક અસરથી બંને કર્મચારીઓને સસ્પેન્ડ કરવાના આદેશ આપવામાં આવ્યા છે.
સ્થાનિકો અને વાહનચાલકોમાં એવી ચર્ચા છે કે આ માત્ર એક કિસ્સો છે, હકીકતમાં નારોલ અને એક્સપ્રેસ વે ચેકપોસ્ટ પર બહારના રાજ્યોના વાહનચાલકોને પરેશાન કરીને ઉઘરાણી કરવાની રીતસરની હાટડીઓ ચાલી રહી છે. ઉચ્ચ અધિકારીઓ બધું જાણતા હોવા છતાં અત્યાર સુધી આંખ આડા કાન કરતા હોવાના પણ આક્ષેપો ઉઠ્યા છે. માત્ર બે કર્મચારીઓને સસ્પેન્ડ કરી દેવાથી આ દૂષણ અટકશે નહીં, તેવી માંગ પણ ઉઠી છે.
