વડોદરા શહેર એસઓજીએ શહેરની બેન્કોમાં ડુપ્લીકેટ નોટો જમા કરાવીને બજારમાં ફરતી કરવાના નેટવર્કનો પર્દાફાશ કરી રાજસ્થાનના માસ્ટરમાઈન્ડ સહિત છ જણાને ઝડપી પાડ્યા છે. આ ગુનામાં હજી એક સૂત્રધાર પકડવાનો બાકી છે. જ્યારે કેટલા વખતથી ષડયંત્ર ચાલતું હતું તેની તપાસ માટે તમામ આરોપીઓને રિમાન્ડ પર લેવાની તજવીજ હાથ ધરાઈ છે.
વડોદરાના બજારમાં જાલી નોટો ફરતી કરવાના ષડયંત્રની માહિતી ગઈ તા.29મી એ વાઘોડિયા રોડની એચડીએફસી બેન્કમાં જમા થયેલી રૂ.500ના દરની 20 ડુપ્લીકેટ નોટો પરથી મળી હતી. જેમાં વલસાડના ડુંગરી ગામે રહેતા સાગર રમેશભાઈ મારૂના ખાતામાં વડોદરામાંથી રૂપિયા જમા થતા બેંક દ્વારા વડોદરા ક્રાઈમ બ્રાન્ચમાં ફરિયાદ કરવામાં આવી હતી.
વડોદરા ક્રાઈમ બ્રાન્ચમાં નોંધાયેલા ગુનાની તપાસમાં વડોદરા એસઓજી સામેલ થઈ હતી અને જેના બેન્ક ખાતામાં રૂપિયા જમા થયા હતા તે સાગર મારૂને વાઘોડિયા રોડ ખાતે કાન્હા ડ્રીમલેન્ડના ફ્લેટમાંથી ઝડપી પાડ્યો હતો. તેના મકાનમાં તપાસ કરતા રોકડા રૂ.2.18 લાખ મળી આવ્યા હતા.
સાગરની પૂછપરછ બાદ નિસર્ગ નામનો મિત્ર નોટો આપી જતો હોવાની વિગતો ખુલતા પોલીસે મૂળ વલસાડના ધરમપુર નજીક વહીયાળ ગામના વતની અને હાલમાં વાઘોડિયા રોડ ગુરુકુળ નજીક રહેતા નિસર્ગ દિનેશભાઈ પટેલ (રહે-હાંડે જીમ બિલ્ડીંગ, વાઘોડિયા રોડ)ને ઝડપી પાડતા તેની પાસેથી રૂ.500 ની 35 ડુપ્લીકેટ નોટો મળી આવી હતી.
નિસર્ગની પૂછપરછ બાદ ધનુષ હલ્લીકેરી(હાલ રહે-શિવાલિક પેલેસ હોસ્ટેલ, દત્તપુરા, વાઘોડિયા રોડ મોરબી) નું નામ ખુલતા પોલીસે તેને પણ ઉપાડી લીધો હતો અને એના રૂમમાં તપાસ કરતા રૂ.500ના દરની 50 નોટો મળી આવી હતી. ત્યારબાદ પોલીસે ગેંગ માટે મદદરૂપ થતા ભાવેશ શર્મા (શ્યામલ કાઉન્ટી, વાઘોડિયા રોડ મૂળ મોરબી) અને તીર્થ લીખીયા(રહે-શિવાલીક પેલેસ હોસ્ટેલ, વાઘોડિયા રોડ મૂળ મોરબી) પણ પકડાઈ ગયા હતા.
પોલીસની પૂછપરછ બાદ સમગ્ર પ્રકરણનું પગેરું રાજસ્થાન પહોંચ્યું હતું અને બે મુખ્ય સૂત્રધારના નામ ખુલ્યા હતા. જેથી પોલીસની એક ટીમ તાબડતોબ રાજસ્થાન પહોંચી હતી અને બે સૂત્રધાર પૈકી અક્ષય સાવરલાલ ગોયલ (રહે-અમરીકા બાડીયા, કૃષિ મંડી રોડ, બ્યાવર, રાજસ્થાન) ઝડપાઈ ગયો હતો. જ્યારે મનોહર ઉર્ફે મુન્નો ગુજર ભાગી છુટતા તેની શોધખોળ હાથ ધરાઈ છે.
