અમદાવાદમાં છેલ્લા પાંચ દિવસમાં જ તાપમાનમાં 4 ડિગ્રીનો તોતિંગ વધારો જોવા મળ્યો છે. આજે નોંધાયેલું 43.8 ડિગ્રી તાપમાન સામાન્ય કરતાં3.6 ડિગ્રી વધુ છે. છેલ્લા 15 વર્ષના ઇતિહાસમાં એપ્રિલ માસમાં તાપમાન 43 ડિગ્રીને પાર થયું હોય તેવું આ પાંચમી વખત બન્યું છે. હવામાન નિષ્ણાતોના મતે, આગામી બે દિવસમાં અમદાવાદમાં પારો 45 ડિગ્રી સુધી પણ પહોંચી શકે છે.
અમદાવાદ ઉપરાંત રાજ્યના અન્ય શહેરોમાં પણ કાળઝાળ ગરમીનો અનુભવ થયો હતો. 41 ડિગ્રીથી વધુ તાપમાન નોંધાયું હોય તેવા શહેરોમાં સુરતમાં 41.2 ડિગ્રી સામાન્ય કરતાં 4.2 ડિગ્રી વધુ, અમરેલી, રાજકોટ, ભુજ, ગાંધીનગર, વડોદરા, ડીસા અને ભાવનગરમાં પણ પારો 41 ડિગ્રીને પાર રહ્યો હતો.
હવામાન વિભાગ દ્વારા આગામી 4 દિવસ માટે ગરમીનું જોર યથાવત્ રહેવાની આગાહી કરવામાં આવી છે. રાજ્યમાં હજુ પણ તાપમાનમાં 2થી 3 ડિગ્રીનો વધારો થઈ શકે છે. ખાસ કરીને અમદાવાદમાં 44 ડિગ્રીથી વધુ તાપમાન રહેવાની શક્યતાને જોતા ‘યલો ઍલર્ટ’ જેવી સ્થિતિ સર્જાઈ છે. જોકે, આ ગરમીના સ્પેલ બાદ તાપમાનમાં સાધારણ ઘટાડો થવાની આશા છે.
