ગિરનારના સાન્નિધ્યમાં વસેલું ઐતિહાસિક અને ધાર્મિક નગર જૂનાગઢ હવે વન્યપ્રાણીઓ અને પ્રવાસીઓ વચ્ચેના વધતા જતા સંઘર્ષનું મુખ્ય કેન્દ્ર બની ગયું છે. એક તરફ રાજ્ય સરકાર જૂનાગઢને વિશ્વકક્ષાનું ટૂરિઝમ હબ બનાવવા માટે લાખો રૂપિયાનો પ્રચાર-પ્રસાર કરી રહી છે, જેને પગલે અહીં પ્રવાસીઓનું ઘોડાપૂર ઉમટી રહ્યું છે. પરંતુ બીજી તરફ, ગિરનારના જંગલમાં સિંહ અને દીપડાની વધતી સંખ્યા વચ્ચે પ્રવાસીઓની સુરક્ષા સામે ગંભીર સવાલો ઊભા થયા છે. છેલ્લા 24 કલાકમાં જ બનેલી બે વન્યજીવ ઘટનાઓએ સ્થાનિક પ્રશાસનની ઊંઘ ઉડાડી દીધી છે અને પ્રવાસીઓની સુરક્ષા પર મોટું પ્રશ્નાર્થ ચિહ્ન મૂકી દીધું છે.
પ્રથમ ઘટના ગત રાત્રિના સમયે ગિરનાર દરવાજા નજીક આવેલા પ્રસિદ્ધ વાઘેશ્વરી મંદિર ખાતે બની હતી. તે સમયે મોટી સંખ્યામાં શ્રદ્ધાળુઓ દર્શનાર્થે પહોંચ્યા હતા. શ્રદ્ધાળુઓ દર્શન કરીને બહાર નીકળી જ રહ્યા હતા, ત્યારે અચાનક મંદિરના દરવાજા પાસે બે સિંહ આવી પહોંચ્યા હતા. સિંહોને જોઈને યાત્રિકોમાં ભારે ફફડાટ વ્યાપી ગયો હતો અને ભાગદોડ મચી ગઈ હતી. ઘટના અંગે જાણ થતાં જ વન વિભાગની ટીમે તાત્કાલિક સ્થળ પર પહોંચીને સિંહોને સફળતાપૂર્વક જંગલ તરફ ખદેડી મૂક્યા હતા.
