વડોદરા જિલ્લાના ડભોઈ તાલુકામાં આવેલા ભીલાપુર ગામે સોશિયલ મીડિયા પર મૂકવામાં આવેલી એક પોસ્ટના કારણે રાજકીય માહોલ ભારે ગરમાયો છે. ગામમાં ખુલ્લેઆમ દારૂ વેચાય છે તેવી વિવાદાસ્પદ પોસ્ટ ફેસબૂક પર મૂકાયા બાદ ભાજપના જ બે જૂથના કાર્યકરો વચ્ચે તીખા અણબનાવ સાથે જાહેરમાં મારામારી થઈ હતી. ગામના મુખ્ય માર્ગ પર બંને જૂથો સામસામે આવી જતાં અફરાતફરી મચી ગઈ હતી અને ભારે બોલાચાલી બાદ જૂથ અથડામણ થઈ હતી. આ હિંસક ઘટનાના વીડિયો પણ સોશિયલ મીડિયામાં વાઇરલ થયા છે, જેનાથી સમગ્ર પંથકમાં ચર્ચા જાગી છે.
આ પોસ્ટને કારણે બીજું જૂથ ઉશ્કેરાઈ ગયું હતું અને બપોરના સમયે ગામના મુખ્ય માર્ગ પર બંને પક્ષો આમનેસામને આવી ગયા હતા. મારામારી દરમિયાન પરેશ જયેશભાઈ પટેલ અને કિરણ પ્રદીપભાઈ પટેલ નામના બે વ્યક્તિઓને માથાના ભાગે ગંભીર ઈજાઓ પહોંચતા તેમને તાત્કાલિક સારવાર અર્થે ખસેડવામાં આવ્યા છે. બનાવની જાણ થતાં જ પોલીસ કાફલો સ્થળ પર પહોંચી ગયો હતો, જોકે મોડી સાંજ સુધી આ મામલે કોઈ સત્તાવાર ફરિયાદ નોંધાઈ નહોતી.
