ઇડર તાલુકાના વીરપુર ગામમાંથી પ્રસૂતિ માટે ૧૦૮ એમ્બ્યુલન્સની મદદ માંગવામાં આવી ત્યારે કદાચ કોઈને ખ્યાલ નહોતો કે આવનારા થોડા સમય દરમિયાન એક અત્યંત પડકારજનક પરિસ્થિતિનો સામનો કરવાનો રહેશે. જાણ થતાં જ ૧૦૮ એમ્બ્યુલન્સના તબીબી સહાયક મુકેશભાઈ અને વાહનચાલક પ્રવિણ ખરાડી તાત્કાલિક સ્થળ પર પહોંચી ગયા હતા.
પ્રસૂતાને હોસ્પિટલ તરફ લઈ જવામાં આવી રહી હતી. પરંતુ હોસ્પિટલ પહોંચે તે પહેલાં જ એમ્બ્યુલન્સમાં પ્રસૂતિની પીડા શરૂ થઈ ગઈ. પરિસ્થિતિની ગંભીરતા ત્યારે વધુ સ્પષ્ટ થઈ, જ્યારે બાળક પગની બાજુથી બહાર આવતું હોવાનું જણાયું. સાથે જ બાળકની નાળ ગળાની આસપાસ વીંટળાયેલી હતી અને બાળક દ્વારા ગર્ભમાં જ મળનો ત્યાગ કરવામાં આવ્યો હોવાનું પણ જણાયું.
આ ક્ષણે સમય ખૂબ જ કિંમતી હતો. આવી મુશ્કેલ પરિસ્થિતિમાં તબીબી સહાયક મુકેશભાઈએ પોતાની તાલીમ અને અનુભવનો ઉપયોગ કરી જરૂરી તાત્કાલિક કામગીરી હાથ ધરી. બીજી તરફ વાહનચાલક પ્રવિણ ખરાડીએ પણ એમ્બ્યુલન્સને યોગ્ય રીતે સંભાળવાની સાથે પ્રસૂતિની સમગ્ર પ્રક્રિયામાં જરૂરી સહયોગ આપ્યો.
બંને વચ્ચેના સંકલન અને ટીમવર્કના કારણે એમ્બ્યુલન્સમાં જ પ્રસૂતિ સફળતાપૂર્વક પૂર્ણ થઈ. થોડા સમય પહેલાં જે વાહનમાં જીવન બચાવવા માટેની દોડધામ ચાલી રહી હતી, એ જ એમ્બ્યુલન્સમાં નવજાતના આગમનની ક્ષણે ખુશીની લાગણી પ્રસરી ગઈ.
આ સમગ્ર કામગીરી દરમિયાન વરિષ્ઠ તબીબી અધિકારી તથા તબીબી સલાહકાર ડૉ. હસમુખ સર તરફથી મળતા માર્ગદર્શન અને તબીબી સલાહ પણ ટીમ માટે મહત્વપૂર્ણ બની રહી હતી.
પ્રસૂતિ બાદ માતા અને નવજાત બાળકની જરૂરી પ્રાથમિક સંભાળ અને તપાસ કરવામાં આવી. ત્યારબાદ બંનેને વધુ સારવાર અને નિરીક્ષણ માટે હોસ્પિટલમાં સુરક્ષિત રીતે પહોંચાડવામાં આવ્યા.
