જુહાપુરાના જુવેરિયા ફ્લેટમાં રહેતા 19 વર્ષીય મોહમ્મદ સાલીક શેખને ગત રમઝાનમાં અજીમ પાર્ક નજીક રહેતા રેહાન પઠાણ સાથે કોઈ બાબતે ઝઘડો થયો હતો. આ વિવાદ બાદ મોહમ્મદ સાલીકે પોતાના ઈન્સ્ટાગ્રામ એકાઉન્ટ પર એક સ્ટોરી અપલોડ કરી હતી. આ સોશિયલ મીડિયા પોસ્ટને લઈને આરોપીઓ ઉશ્કેરાયા હતા અને મનમાં અદાવત રાખી હતી.
બુધવારે (22મી એપ્રિલ) સાંજે આરોપીઓ રેયાન ઉર્ફે 500, ફૈસલ ઉર્ફે પચી અને ફૈઝાન ઉર્ફે ફૈઝુએ મોહમ્મદ સાલીકનો રસ્તો રોકી ઝઘડો શરૂ કર્યો હતો. આરોપીઓએ માત્ર હથિયારો જ નહીં પરંતુ પથ્થરમારો કરીને વિસ્તારમાં ભયનો માહોલ પેદા કર્યો હતો. હત્યાની આ ઘટનામાં આરોપીઓની ક્રૂરતા સામે આવી છે. મારામારી દરમિયાન જ્યારે સાલીક બચવાનો પ્રયત્ન કરી રહ્યો હતો, ત્યારે આરોપી ફૈસલ ઉર્ફે પચીએ તેને મજબૂતીથી પકડી રાખ્યો હતો. આ તકનો લાભ લઈને મુખ્ય આરોપી રેયાન ઉર્ફે 500એ સાલીકના જમણા પડખાના ભાગે છરીનો જીવલેણ ઘા ઝીંકી દીધો હતો. જોકે, ગંભીર રીતે ઈજાગ્રસ્ત યુવકનું ટૂંકી સારવાર દરમિયાન મોત નીપજ્યું હતું.
જાહેરમાં થયેલી આ હત્યાની ઘટનાને પગલે સમગ્ર વિસ્તારમાં ભયનો માહોલ ફેલાયો હતો. ઘટનાની જાણ થતા જ પોલીસ કાફલો ઘટનાસ્થળે પહોંચી ગયો હતો. પોલીસે ગણતરીના કલાકોમાં જ મુખ્ય આરોપી રેહાન અબ્બાસઅલી પઠાણ અને તેના અન્ય સાથીદારોની ધરપકડ કરી લીધી છે. હાલ પોલીસ આ મામલે વધુ તપાસ કરી રહી છે.
