છોટાઉદેપુર જિલ્લાની નસવાડી જૂથ ગ્રામ પંચાયતમાં ભારે હોબાળો અને પથ્થરમારાની ઘટના સામે આવી છે. સરપંચ મેહુલકુમાર તડવી સામે પંચાયતના 12 સભ્યોએ રજૂ કરેલી અવિશ્વાસની દરખાસ્ત પર મતદાન માટે આજે (4 નવેમ્બર)ના રોજ ખાસ બેઠક બોલાવવામાં આવી હતી. આ બેઠક દરમિયાન તંગદિલી ભર્યુ વાતાવરણ સર્જાયું હતું.
મુખ્યમંત્રીના હસ્તે પંચાયતને મળેલી રૂ.3 કરોડથી વધુની વિકાસ ગ્રાન્ટ અને નાણાં પંચની રૂ.1 કરોડની ગ્રાન્ટના વપરાશ તેમજ વિકાસ કાર્યોના આયોજન મુદ્દે સરપંચ અને સભ્યો વચ્ચે લાંબા સમયથી ગજગ્રાહ ચાલતો હતો. સભ્યોનો આક્ષેપ હતો કે સરપંચ મનસ્વી રીતે કામ કરે છે, જ્યારે સરપંચે જણાવ્યું હતું કે તેઓ કોઈ ખોટું કામ થવા દેશે નહીં.
આ બેઠક પહેલાં ભાજપના મોવડી મંડળ દ્વારા સભ્યોને મનાવવાના તમામ પ્રયાસો નિષ્ફળ રહ્યા હતા અને સભ્યો અજ્ઞાત સ્થળે જતા રહ્યા હતા, જેના પગલે આજે પંચાયત કચેરી ખાતે આ હિંસક બબાલ સર્જાઈ હતી.
