સાવન બરવાલે એશિયન ગેમ્સ 2026માં પુરુષ મેરેથોન સ્પર્ધામાં સિલ્વર મેડલ જીતીને ઇતિહાસ રચી દીધો છે. 2:11:37ના પર્સનલ બેસ્ટ સમય સાથે તેમણે 44 વર્ષ બાદ ભારતને આ ઇવેન્ટમાં પદક અપાવ્યો છે. જાપાનના ઇચિટાકા યામશિતાએ ગોલ્ડ મેડલ જીત્યો, જ્યારે ચીનના પેઇયુ ફેંગને બ્રોન્ઝ મેડલ મળ્યો હતો. સાવને આ રેસના મોટાભાગના સમય સુધી પોતાની સરસાઈ જાળવી રાખી હતી.
નાગોયામાં ભારતના સાવન બરવાલે એ કરી બતાવ્યું જેની રાહ આખો દેશ છેલ્લા 44 વર્ષથી જોઈ રહ્યો હતો. સાવને શનિવારે વહેલી સવારે 2 કલાક 11 મિનિટ 37 સેકન્ડનો સમય નોંધાવ્યો, જે તેમનો પર્સનલ બેસ્ટ સમય પણ છે. આ શાનદાર પ્રદર્શન સાથે ભારતને 1982 પછી પહેલીવાર એશિયન ગેમ્સની મેરેથોનમાં પોડિયમ ફિનિશ મળી છે. આ સાથે જ આ સમય હવે નવો રાષ્ટ્રીય રેકોર્ડ પણ બની ગયો છે.
જાપાનના ઇચિટાકા યામશિતાએ 2:10:49ના સમય સાથે ગોલ્ડ મેડલ પોતાના નામે કર્યો હતો, જ્યારે સાવન તેમનાથી માત્ર 48 સેકન્ડ પાછળ રહ્યા હતા. ચીનના પેઇયુ ફેંગે 2:12:13ના સમય સાથે બ્રોન્ઝ મેડલ જીત્યો હતો.
ઉલ્લેખનીય છે કે, સાવને આ વર્ષે જ એપ્રિલમાં રોટરડામ મેરેથોનમાં 2:11:58નો સમય કાઢીને શિવનાથ સિંહનો 48 વર્ષ જૂનો રાષ્ટ્રીય રેકોર્ડ તોડ્યો હતો. શિવનાથ સિંહે 1978માં 2:12:00નો રેકોર્ડ બનાવ્યો હતો. નાગોયામાં સાવને પોતાના જ તે રેકોર્ડથી વધુ સારો સમય નોંધાવ્યો છે. આ રેસમાં બીજા ભારતીય દોડવીર કાર્તિક કરકેરા 19 દોડવીરોમાં 17મા સ્થાને રહ્યા હતા.
