નાલાસોપારામાં એક મહિલાએ તેના પ્રેમીની મદદથી તેના પતિની હત્યા કરી અને લાશને તેના ઘરની જમીનમાં દાટી દીધી. આ ઘટના સોમવારે સવારે પ્રકાશમાં આવી. ઘટના બાદ પત્ની અને તેનો પ્રેમી ફરાર થઈ ગયા અને પોલીસ તેમને શોધી રહી છે.
વિજય ચૌહાણ (૩૫) તેની પત્ની ચમન દેવી ચૌહાણ (૨૮) સાથે નાલાસોપારા પૂર્વના ધનીવ બાગના ગંગડીપાડામાં રહેતો હતો. તે છેલ્લા ૧૫ દિવસથી ગુમ હતો. બિલાલપાડામાં રહેતા ચૌહાણના બે ભાઈઓ તેને શોધી રહ્યા હતા. દરમિયાન, ચમન દેવી બે દિવસ પહેલા ગુમ થઈ ગઈ હતી. તેના પગલે બાજુમાં રહેતો મોનુ શર્મા નામનો યુવક પણ ગુમ થઈ ગયો હતો. ચમન દેવી ચૌહાણ અને મોનુ શર્મા પ્રેમ સંબંધમાં હતા અને તે બંને ભાગી ગયા હોવાનું બહાર આવ્યું હતું.
આ દરમિયાન, ચૌહાણના બે ભાઈઓ સોમવારે સવારે ગંગડીપાડામાં ઓમ સાંઈના ઘરે આવ્યા હતા. ઘરમાં લાગેલી ટાઇલ્સના રંગો અલગ અલગ જોવા મળ્યા. તેમણે ટાઇલ્સ કાઢી નાખી અને દુર્ગંધ આવવા લાગી. તેમણે તાત્કાલિક પોલીસને ફોન કર્યો. પેલ્હાર પોલીસ ઘટનાસ્થળે પહોંચી અને મ્યુનિસિપલ ડોક્ટરો, કર્મચારીઓ, તહસીલદાર, ફોરેન્સિક નિષ્ણાતોની મદદથી પંચનામા કરીને મૃતદેહ બહાર કાઢ્યો.
પોલિસે મૃતદેહને કબજે લીધો છે અને આગળની કાર્યવાહી માટે જેજે હોસ્પિટલ મોકલી દીધો છે. આ મામલે પેલ્હાર પોલીસ સ્ટેશનમાં કેસ નોંધવામાં આવ્યો છે.
