700 કામદારોનું લાયસન્સ કઢાવવા માટે વડોદરાની શ્રમ આયુક્ત કચેરીમાં અરજી કરવામાં આવતા લાયન્સ આપવાના બદલામાં મદદનીશ શ્રમ આયુક્તે રૂ..70000ની લાંચની માગણી કરી હતી. એસીબીએ છટકું ગોઠવીને લાંચ કેસમાં આસિસ્ટન્ટ કમિશનર અને લેબર ઓફિસરની ધરપકડ કરી હતી. આજે આ બન્ને આરોપીને કોર્ટમાં રજૂ કરવામાં આવતા ન્યાયાધીશે બન્ને આરોપીને જેલમાં મોકલી આપવાનો આદેશ કર્યો હતો.
આજે એસીબીએ આ બન્ને આરોપી દીપકકુમાર અંબાલાલ ચૌહાણ (રહે.બી-32, સિદ્ધેશ્વર હિલેરીયસ, મોટનાથ મંદિર પાસે, હરણી, વડોદરા) અને રણજીતસિંહ નટવરસિંહ જાદવ (રહે. 891, અક્ષરસીટી, કપુરાઇ ચોકડી, ડભોઇ રોડ, કેલનપુર, વડોદરા)ને કોર્ટમાં રજૂ કરી 3 દિવસના રિમાન્ડની માગણી કરી હતી. તપાસ અધિકારીએ રજૂઆત કરી હતી કે, લાંચની રકમ બીજા કોને કોને આપવાની હતી. બંને અધિકારીઓ એક જ ઓફિસમાં કામ કરતા હોવાથી અગાઉ આ પ્રકારના લાંચના કેટલા ગુનામાં સંડોવાયેલા છે તેની તપાસ કરવાની છે.
જો કે, ન્યાયાધીશે બંને પક્ષની દલીલ સાંભળ્યા બાદ બંને આરોપીઓના રિમાન્ડ ના મંજૂર કરી તેમને જેલમાં મોકલી આપવાનો આદેશ કર્યો હતો. બીજી તરફ, લાંચ કેસની ગંભીરતાને ધ્યાનમાં રાખી એસીબીની ટીમે બંને આરોપીઓના ઘરે આજે સર્ચ કર્યું હોવાનું એસીબીના સૂત્રોએ જણાવ્યું હતું.
