બોલિવૂડના ‘સિંઘમ’ એટલે કે અજય દેવગન ફરી એકવાર મોટા પડદા પર ધૂમ મચાવવા માટે તૈયાર છે. 25 જૂનના રોજ નિર્માતાઓએ તેમની આગામી હાઈ-ઓક્ટેન એક્શન એન્ટરટેનર ફિલ્મ ‘ચૌહાણ’નો ફર્સ્ટ લુક અને એનાઉન્સમેન્ટ વીડિયો જાહેર કર્યો છે. ચાહકો પોતાના મનપસંદ સ્ટારને ફરી એકવાર ખતરનાક એક્શન અવતારમાં જોવા માટે ખૂબ જ ઉત્સાહિત છે. જોકે સમગ્ર ટીઝરમાં સૌથી વધુ ચર્ચા અજય દેવગનના એક ડાયલોગે જગાવી છે, જેના કારણે સોશિયલ મીડિયા પર નવી ચર્ચા શરૂ થઈ ગઈ છે.
નિર્માતાઓએ આ ધમાકેદાર એનાઉન્સમેન્ટ વીડિયો રિલીઝ કરવા માટે એક ખાસ અને ભાવુક દિવસ પસંદ કર્યો હતો. તેમણે આ વીડિયો અજય દેવગનના પિતા અને હિન્દી સિનેમાના દિગ્ગજ એક્શન ડિરેક્ટર વીરુ દેવગનની જન્મજયંતિ પર જાહેર કર્યો હતો.
આ વિવાદ પાછળ ટીઝરની ટાઇમિંગ પણ ખૂબ મહત્ત્વ ધરાવે છે. હકીકતમાં, 25 જૂન 2026ના રોજ જ શાહરુખ ખાને ફિલ્મ ઇન્ડસ્ટ્રીમાં પોતાના શાનદાર 34 વર્ષ પૂર્ણ કર્યા છે, અને સોશિયલ મીડિયા પર તેમના ચાહકો આ પ્રસંગની ઉજવણી કરી રહ્યા હતા. બરાબર એ જ દિવસે અજય દેવગનનું આ ટીઝર રિલીઝ થયું અને સમગ્ર ચર્ચા ‘પઠાન’ વિરૂદ્ધ ‘ચૌહાણ’ તરફ વળી ગઈ. ઉલ્લેખનીય છે કે શાહરુખ ખાનના કરિયરની સૌથી મોટી હિટ ફિલ્મોમાં ‘પઠાન’ મોખરે છે, જેણે Rs 1,000 કરોડથી વધુની કમાણી કરી હતી.
જોકે સોશિયલ મીડિયા પર અસલી ખળભળાટ ત્યારે મચ્યો જ્યારે વીડિયોના અંતમાં અજય દેવગને સ્ક્રીન પર પાવરફુલ અંદાજમાં કહ્યું, ‘પઠાણોને કહી દેજો, ચૌહાણ આવી રહ્યો છે!’
અજય દેવગનના મોઢેથી આ ડાયલોગ સાંભળતાની સાથે જ યુઝર્સ વચ્ચે અટકળોનો દોર શરૂ થઈ ગયો છે. ચાહકો પ્રશ્ન ઉઠાવી રહ્યા છે કે શું આ લાઇન શાહરુખ ખાનની 2023ની બ્લોકબસ્ટર ફિલ્મ ‘પઠાન’ તરફ કોઈ સીધો કે પરોક્ષ કટાક્ષ છે?
જોકે, ફિલ્મના નિર્માતાઓએ અત્યાર સુધી આ અટકળો અંગે કોઈ સત્તાવાર નિવેદન આપ્યું નથી. જ્યાં કેટલાક લોકોનું માનવું છે કે આ શાહરુખની એક્શન ફ્રેન્ચાઇઝી પર કરવામાં આવેલો એક રમૂજી કટાક્ષ છે, ત્યાં બીજા પક્ષનું કહેવું છે કે તેને કોઈ વિવાદ સાથે જોડવો જોઈએ નહીં. આ માત્ર અજયના પાત્ર ‘ચૌહાણ’ના સ્વેગ અને વાર્તાને વધુ અસરકારક બનાવવા માટે લખવામાં આવેલો સામાન્ય માસ-હીરો ડાયલોગ હોઈ શકે છે.
જિયો સ્ટુડિયોઝ અને કલર યેલો ફિલ્મ્સના બેનર હેઠળ બની રહેલી ‘ચૌહાણ’નું નિર્દેશન નીરજ યાદવ કરી રહ્યા છે. જ્યારે ફિલ્મનું નિર્માણ જ્યોતિ દેશપાંડે, આનંદ એલ. રાય અને હિમાંશુ શર્મા સંભાળી રહ્યા છે. નિર્માતાઓએ ફિલ્મની રિલીઝ તારીખ પરથી પડદો ઉઠાવતા જણાવ્યું છે કે આ મેગા એક્શન ફિલ્મ 1 ઓક્ટોબર 2027ના રોજ સિનેમાઘરોમાં રિલીઝ થશે. ત્યાં સુધી આ એક જ ડાયલોગે દર્શકોમાં જે હાઇપ ઊભી કરી છે, તે ખરેખર જોવા જેવી છે.
