કન્ફેડરેશન ઓફ ઓલ ઈન્ડિયા ટ્રેડર્સ (કેટ)ના રાષ્ટ્રીય મંત્રી અને અખિલ ભારતીય ખાદ્ય તેલ વેપારી મહાસંઘના રાષ્ટ્રીય અધ્યક્ષ શંકર ઠક્કરે જણાવ્યું કે ચાંદની ચોકના સાંસદ અને કેટના રાષ્ટ્રીય મહામંત્રી પ્રવીણ ખંડેલવાલે દિલ્હીની માનનીય મુખ્યમંત્રી શ્રીમતી રેખા ગુપ્તા પ્રત્યે ઊંડી કૃતજ્ઞતા વ્યક્ત કરી છે. તેમણે જણાવ્યું કે મુખ્યમંત્રીએ ચાંદની ચોક સહિત દિલ્હીના અન્ય વિસ્તારોમાં વેપારીઓને અસર કરતાં સીલિંગ મુદ્દે ઝડપી, સંવેદનશીલ અને અસરકારક રીતે હસ્તક્ષેપ કર્યો છે.
શનિવારે ખંડેલવાલ દ્વારા મુખ્યમંત્રીને આ મુદ્દે તાત્કાલિક હસ્તક્ષેપ કરવા વિનંતી કર્યા બાદ, શ્રીમતી ગુપ્તાએ તરત જ ખંડેલવાલના નેતૃત્વ હેઠળ વેપારીઓના પ્રતિનિધિમંડળને મળીને જમીન સ્તરની સ્થિતિની માહિતી લીધી. બાદમાં તેમણે વરિષ્ઠ અધિકારીઓ સાથે ઉચ્ચસ્તરીય બેઠક બોલાવી અને દિલ્હી સરકારને આ મુદ્દો માનનીય સર્વોચ્ચ ન્યાયાલય સમક્ષ તરત જ રજુ કરવા સૂચના આપી.
મુખ્યમંત્રીએ આપેલા આદેશ મુજબ આ મુદ્દો સર્વોચ્ચ ન્યાયાલય સમક્ષ રજુ થયો જેમાં માનનીય અદાલતે દિલ્હી મ્યુનિસિપલ કોર્પોરેશન (MCD) અધિનિયમ હેઠળ વેપારીઓને મળેલા અધિકારોને યથાવત્ રાખતા અપીલીય ટ્રિબ્યુનલને સૂચના આપી છે કે 62 બાકી રહેલી અપીલો પર 31 ડિસેમ્બર 2025 સુધી ગુણના આધારે નિર્ણય આપે.
ખંડેલવાલે જણાવ્યું, “અમે મુખ્યમંત્રી શ્રીમતી રેખા ગુપ્તાનો હાર્દિક આભાર વ્યક્ત કરીએ છીએ જેમણે વેપારીઓની પીડાને સમજીને ઝડપી, નિર્ણાયક અને સંવેદનશીલ પગલાં લીધાં. તેમના નેતૃત્વ અને સક્રિય પહેલને કારણે દિલ્હીના વેપારીઓનો અવાજ સર્વોચ્ચ ન્યાયાલય સુધી પહોંચ્યો. આ હસ્તક્ષેપથી વેપાર વર્ગમાં અતિશય રાહત અને આત્મવિશ્વાસનો સંચાર થયો છે.”
તેમણે આગળ જણાવ્યું કે હવે સીલિંગ મુદ્દાને સમગ્ર અને કાયમી ઉકેલની દિશામાં જોવાની જરૂર છે જેથી વેપારીઓને વારંવાર અનિશ્ચિતતા અને શોષણનો સામનો ન કરવો પડે.
ખંડેલવાલે જણાવ્યું કે તેઓ જલદી જ દિલ્હીની મુખ્ય વેપારી સંસ્થાઓ અને આગેવાનોની બેઠક બોલાવશે જેથી સીલિંગ સમસ્યાના લાંબા ગાળાના ઉકેલ માટે વ્યાપક વ્યૂહરચના તૈયાર કરી શકાય. જરૂરી જણાશે તો કેટ સર્વોચ્ચ ન્યાયાલયમાં એક જનહિત અરજી (PIL) પણ દાખલ કરશે જેમાં દર્શાવવામાં આવશે કે સંસદ દ્વારા પસાર કરાયેલા MCD અધિનિયમની જોગવાઈઓની અવગણના કરીને સંબંધિત અધિકારીઓએ વેપારીઓને તેમના કાનૂની અને મૂળભૂત અધિકારોથી વંચિત કર્યા છે.
તેમણે આ બાબત પર પણ ધ્યાન દોર્યું કે રાષ્ટ્રીય રાજધાની ક્ષેત્ર દિલ્હી (વિશેષ જોગવાઈ) અધિનિયમ, જે જૂની દિલ્હી જેવા “વિશેષ વિસ્તારો”ને સંરક્ષણ આપે છે, તેની સતત અવગણના થઈ રહી છે. આ અધિનિયમ હેઠળ રક્ષણ હોવા છતાં સીલિંગ નોટિસ અને કાર્યવાહી ચાલુ છે, જે માત્ર ગેરકાયદેસર જ નહીં પણ અન્યાયપૂર્ણ પણ છે.
ખંડેલવાલે જણાવ્યું કે તેઓ આગામી સંસદીય સત્રમાં પણ આ મુદ્દો ઉઠાવશે જેથી દિલ્હીના વેપારીઓના અધિકારોની પૂરી રીતે રક્ષા થઈ શકે.
દિલ્હીના વેપારીઓ હંમેશા શહેરની અર્થવ્યવસ્થાની કરોડરજ્જુ રહ્યા છે તેઓ નાગરિકોની સેવા નિષ્ઠા અને સમર્પણથી કરે છે. તેમને જૂની કે ખોટી રીતે લાગુ પડેલી જોગવાઈઓ હેઠળ દંડિત કરવું માત્ર અન્યાયપૂર્ણ જ નહીં પરંતુ સુશાસનની ભાવનાના પણ વિરુદ્ધ છે,” ખંડેલવાલે જણાવ્યું.
શંકર ઠક્કરે જણાવ્યું કે આ આદેશ દિલ્હીના વેપારી સમુદાય માટે એક મોટી રાહત અને ન્યાય લાવ્યો છે, જેના કારણે તેમની ન્યાયિક પ્રક્રિયા પ્રત્યેની વિશ્વસનીયતા પુનઃસ્થાપિત થઈ છે અને કાયદાનું પાલન કરનારા વેપારીઓ વિરુદ્ધ કોઈ મનસ્વી કે ભેદભાવપૂર્ણ પગલાં ન લેવામાં આવે તે સુનિશ્ચિત થયું છે.
